Cydweithredu i Ofalu ydym ni

Mae Llywodraeth Cymru yn annog pobl sy’n defnyddio gwasanaethau gofal a lles i gael mwy o ddweud yn y ffordd y cânt eu rhedeg a beth y maen nhw’n eu cynnig. Mae eisiau i fwy o gydweithrediadau a mentrau cymdeithasol gyflwyno’r gwasanaethau hyn.

Caiff Cydweithredu i Ofalu ei ariannu gan Lywodraeth Cymru a’i gyflwyno gan Ganolfan Cydweithredol Cymru. Rydym ni’n darparu help i bobl sydd eisiau sefydlu neu redeg gwasanaethau gofal a lles mewn ffordd fwy cydweithrediadol a chydweithredol. Credwn fod gwasanaethau’n well pan fo’r bobl sydd angen gofal a chymorth, a’r bobl sy’n darparu cymorth, yn gweithio’n agos â’i gilydd.

Mae cydweithrediaeth yn sefydliad neu’n fusnes y mae ei aelodau yn ei redeg ac yn berchen arno, ar y cyd.

Ein gwaith â chymunedau

Os oes gennych chi syniad ynghylch sut y gellid rhedeg gwasanaethau gofal a lles, gallwn eich helpu chi a’ch cymuned i ddatblygu eich syniadau i fod yn wasanaeth llwyddiannus. Rydym ni hefyd yn gweithio gyda sefydliadau sydd eisoes yn cyflwyno gwasanaethau i gynnwys y bobl sy’n defnyddio’r gwasanaethau hynny yn y ffordd y cânt eu rhedeg.

Byddwn yn eich helpu chi i:

• Ddod â phobl at ei gilydd i drafod syniadau a meddwl am ffyrdd i gydweithio.
• Meddwl am sut i reoli’r gwasanaeth er mwyn i bawb gael dweud eu dweud ynghylch sut y caiff ei redeg.
• Datblygu’r syniad a phrofi a fydd yn gweithio’n ymarferol.
• Darparu hyfforddiant ar bob agwedd ar redeg gwasanaeth cydweithredol.
• Eich cynorthwyo chi gyda holl agweddau cyfreithiol ar sefydlu’r gwasanaeth.

Ein gwaith â phartneriaid

Rydym ni’n gweithio ag awdurdodau lleol, byrddau iechyd, cymdeithasau tai, elusennau a sefydliadau gwirfoddol, i’w helpu nhw i gynnwys pobl sy’n defnyddio gwasanaethau, yn y ffordd y cânt eu rhedeg. Rydym ni hefyd yn gweithio gyda’n partneriaid i amlygu cydweithrediadau a mentrau cymdeithasol a all gyflwyno gwasanaethau, fel y nodir yn Neddf Gwasanaethau Cymdeithasol a Llesiant (Cymru).

Rydym ni’n gweithio gyda darparwyr gwasanaeth i amlygu cyfleoedd gwasanaeth cydweithredol, ac annog partneriaethau newydd er mwyn datblygu a chryfhau eu gwasanaethau.

Byddwn yn:

• Helpu i ail-ddylunio gwasanaethau presennol i fod yn fwy cydweithredol fel bod gan bobl lais cryd a rheolaeth dros eu gwasanaethau.
• Darparu arweiniad ar gynllunio busnes, strwythurau cyfreithiol a llywodraethu.
• Cynorthwyo partneriaid sydd eisiau comisiynu gwasanaethau a chydweithrediadau

Ein pecyn cymorth ar-lein

Rydym ni wedi dylunio a llunio pecyn cymorth ar-lein i helpu’r rheiny sydd â diddordeb mewn sefydlu gwasanaeth gofal a lles cydweithredol. Efallai eich bod chi eisoes yn rhedeg gwasanaeth yn eich cymuned a hoffech ei wneud yn fwy cydweithredol neu efallai bod gennych chi syniad ar gyfer gwasanaeth newydd; ni waeth ar ba gam ydych chi, gall ein pecyn cymorth eich helpu chi.

Rydym ni wedi trefnu popeth mewn camau, er mwyn i chi allu gweithio tuag at eich nod yn eich amser eich hun. Ar ôl i chi gwblhau eich taith gydweithredol, gallwn ddarparu cymorth ychwanegol, os oes angen.